Mont Blanc - Hvíti Risinn | Bergmenn fjallaleiðsögumenn | Á Íslandi leggjum við aðaláherslu á ísklifur, fjallaskíða og þyrlu skíðaferðir auk fjallaklifurs

Bókun

Mont Blanc - Hvíti Risinn

Fjöldi

Konungur Alpanna rís 4807 metra yfir frjósama fjalladali Frakklands og Ítalíu. Þetta margrómaða og eftirsótta fjall krefst ekki mikillar klifur kunnáttu en sökum hæðar að þá krefst það góðs undirbúnings bæði líkamlega og andlega. Ferðaáætlun okkar er sérhæfð til þess að hámarka líkurnar á því að ná góðri hæðar aðlögun sem og nægilegan tíma til að glíma við fjallið ef veður eru válynd. Hæðaraðlögunin fer fram á nokkrum öðrum háum tindum í nágrenni Mont Blanc og gefur okkur tækifæri til að kynnast betur því stórfenglega landslagi sem Alparnir hafa uppá að bjóða.

Tímabil: Júní – September 2010
Lengd ferðar: 8 dagar, þar af 6 dagar á fjöllum
Verð miðað við 4,6,8,10 eða 12 farþega: 349.000.- ISK á mann

Við gerum út frá bænum Chamonix í Frakklandi, vöggu og fæðingarstað nútíma fjallamennsku þar sem við njótum menningar og matar á milli þess sem við glímum við fjöllin. Leiðsögumenn okkar með Jökul Bergmann í broddi fylkingar eru allir fagmenntaðir háfjallaleiðsögumenn með áratuga reynslu af klifri og fjallamennsku í Ölpunum, þeir hámarka líkurnar á að þú náir takmarki þínu, að sigra hvíta risann!

Innifalið í verði:

Leiðsögn faglærðra UIAGM fjallaleiðsögumanna alla ferðina (Hámark 4 farþegar per leiðsögumann, en 2 per leiðsögumann dagana á Mont Blanc)
Gisting í 4 nætur á gistiheimili í Chamonix
Gisting 3 nætur í fjallaskálum með morgunmat og kvöldmat
Allar kláf, lyftuferðir og aðrar ferðir í Chamonix dalnum

Mont Blanc,Gouter,alpaferðir,mont blanc ferð,alpaklifur,mont blanc klifur

Ekki innifalið í verði:

Ferðir til og frá Chamonix
Allur matur í Chamonix
Hádegis nesti og annað snarl í skálunum.
Drykkir svo sem flösku vatn og aðrir drykkir í skálunum
Tryggingar
Útbúnaðarleiga

Mont Blanc vikan ferðalýsing:

Dagur 1:
Mæting í Chamonix þar sem leiðsögumaðurinn hittir hópinn seinni part dags og farið er yfir plan vikunnar, útbúnað og aðstæður. Við gistum á gistiheimili með eldunaraðstöðu í 4-6 mann herbergjum. Þarna getum við skilið farangur okkar eftir á meðan við erum á fjöllum sem er nauðsynlegt og þægilegt. Gistiheimilið er í þægilegri göngufjarlægð frá miðbæ Chamonix

Dagur 2:
Við græjum þann búnað sem þarf að græja um morguninn og skoðum okkur aðeins um í Chamonix áður en við höldum af stað upp í Albert 1 skálann sem er í 2702m þar sem við forum yfir broddatækni og notkun ísaxa. Að kvöldi dags snæðum við ljúffengan kvöldverð að hætti hússins og förum snemma í háttinn.

Dagur 3:
Vaknað snemma og fyrsta fjallið klifið. Líklega tökum við Petite Fourche 3619m og á leiðinni niður dembum við okkur niður Blanc skarðið til Swiss og gistum í Trient skálanum sem liggur í 3170m hæð. Þarna náum við fyrirtaks aðlögun og slökum vel á eftir góðan dag.

Dagur 4:
Næsti tindur á dagskrá. Í þetta sinn er það Aiguille du Tour 3542m sem er þægileg snjó og kletta leið sem gefur góða aðlögun. Eftir að tindinum er náð, skutlum við okkur alla leið niður til Chamonix þar sem við eyðum nóttinni á gistiheimilinu og kíkjum kannski út og fögnum fyrsta áfanga þessa Íslenska Alpaleiðangurs.

Dagur 5:
Til að fullkomna okkar góðu aðlögun tökum við enn einn daginn í hæð. Í þetta sinn förum við upp með Aig’d Midi kláfnum uppí 3800m þaðan sem við þverum jökla Vallee Blanche eða Hvíta dal yfir til Helbronner skálans í 3462m. Helbronner er hæðsta landamærastöð Evrópu, ekki gleyma vegabréfinu…. Frá Helbronner tökum við kláf til baka til Chamonix þar sem við gistum aðra nótt og hvílum okkur vel fyrir slaginn við þann stóra hvíta. Ef veðuraðstæður eru erfiðar þá gætum við mögulega hafið Mont Blanc gönguna á degi 5.

Dagur 6:
Rólegur morgunn í hvíld í Chamonix þar sem við græjum okkur fyrir toppadaginn. Eftir hádegi höldum við uppí skála en aðstæður hverju sinni ráða hvort við komumst á Mont Blanc eftir hinni svokölluðu Þriggja tinda leið eða Goûter leiðinni. Ef Þriggja tinda leiðin er fær þá gistum við í Cosmique skálanum en Tete Rousse skálanum ef Goûter leiðin verður fyrir valinu.

Dagur 7:
Stóri dagurinn. Við klífum að öllum líkindum upp Troi Mont Blanc leiðina en niður Goûter leiðina og alla leið til Chamonix. Ef við erum seint á ferð eða fólk þreytt að þá er möguleiki að gista í öðrum skála á leiðinni niður. Tindinum er svo fagnað ógurlega ef einhver orka er eftir……

Dagur 8:
Rólegheita morgun í Chamonix, áframhaldandi ævintýri eða brottför á nýjar slóðir

Frekari upplýsingar:

Greiðsluskilmálar:
30% af heildarverði ferðar 104.700.- ISK á mann greiðist við bókun en eftirstöðvarnar 244.300.- ISK ekki síðar en 90 dögum fyrir brottför.

Matur og Gisting:
Í Chamonix gistum við á gistiheimili í göngufæri frá miðbænum þaðan sem stutt er í allar lyftur, búðir og almenningssamgöngur. Herbergin eru 2-8 manna og gist í kojum. Þeir sem vilja, geta einnig gist í tveggja manna herbergjum gegn aukagjaldi. Gistiheimilið er með eldunaraðstöðu en fjölda veitingastaða er einnig að finna í nágrenninu. Dagana sem að við erum á fjöllum getum við skilið allan farangur eftir í geymslu á gistiheimilinu. Skálarnir bjóða allir uppá veitinga og bar þjónustu ásamt því sem þar er hægt að kaupa helstu nauðsynjar eins og t.d súkkulaði, vatn o.f.l Kvöldverðir eru yfirleitt þrírétta, súpa, kjötréttur og desert en morgunverðurinn er öllu lítilfjörlegri, yfirleitt þurrt brauð, sulta og kaffibolli. Gistingin er í kojum í misstórum herbergjum, yfirleitt 8-24 manna. Nauðsynlegt er að vera með þunnan lakpoka til að sofa í en skálarnir eru allir með sængum, teppum og koddum. Engar sturtur er að finna í skálunum.
Hádegisnesti verður hver og einn að kaupa og taka með sér fyrir ferðina. Best er að vera með sambland af orkustykkjum, súkkulaði, osti og pylsum því samlokur endast illa í bröltinu. Eins og áður sagði er hægt að kaupa heita smárétti í flestum skálanna ásamt öðru snarli og það er oft góður kostur þegar komið er snemma niður af fjalli áður en síðdegis aðlögunarlúrinn er tekinn.

Líkamleg geta, þrek og þor:
Mont Blanc gangan er löng og í mikilli hæð. Tæknileg klifurkunnátta er ekki nauðsynleg en grundvallar kunnátta á jöklagöngu, sprungubjörgun og almennri línuvinnu er nauðsynleg. Yfir þá hluti er farið á fyrri hluta ferðarinnar. Þátttakendur verða að vera í góðu líkamlegu og andlegu formi, það er ótrúlegt hvað andlegi þátturinn spilar stórt hlutverk þegar komið er í hæð og líkaminn fer að kvarta, þá er það oft andlegi styrkurinn sem drífur mann áfram. Góð æfing fyrir Mont Blanc er að ganga á hæstu tinda landsins og það má með sanni segja að ef fólk á í engum vandræðum með Hvannadalshnjúk að þá á Mont Blanc ekki að vera vandamál svo lengi sem hæðaraðlögunin hefur gengið vel. Ein af kröfum Bergmanna til þeirra sem hug hafa á Mont Blanc ferðinni er að hafa klifið stórann tind á Íslandi með leiðsögumönnum okkar á sama tímabili og Mont Blanc ferðin er á döfinni. Þannig geta leiðsögumenn okkar tekið út getu fólks og komið með góða punkta um frekari ferðir eða þjálfun fyrir ferðina stóru.

Búnaður:
Best er að allir þátttakendur séu með sinn eigin búnað sem þeir eru vanir að nota og vita að virkar. Annars er hægt að leigja allan sérhæfðan fjallabúnað hjá Bergmönnum eða í Chamonix. Skoðið meðfylgjandi útbúnaðarlista vel og munið að rétt val á útbúnaði getur skipt sköpum um hvort ferðin er vel heppnuð eða ekki.

Útbúnaðarlisti fyrir Mont Blanc

Sumt af þessum búnaði er hægt að fá leigt hjá Bergmönnum eða hjá Fjallakofanum í Hafnarfirði 510 9505. Ef þú hefur einhverjar spurningar varðandi búnaðarval þá ekki hika við að hafa samband.

Mont Blanc,Gouter,alpaferðir,mont blanc ferð,alpaklifur,mont blanc klifur