Monte Rosa - 4000m Veisla | Bergmenn fjallaleiðsögumenn | Á Íslandi leggjum við aðaláherslu á ísklifur, fjallaskíða og þyrlu skíðaferðir auk fjallaklifurs

Bókun

Monte Rosa - 4000m Veisla

Fjöldi

Monte Rosa er næst hæsta fjall Alpana 4618m og hæsta fjall Sviss. Þetta gríðarstóra fjall á landamærum Ítalíu og Sviss er með 5 meiriháttar tinda sem ná yfir 4000m hæð og bíður uppá sannkallaða veislu fyrir þá sem vilja glíma við hæð og stórfenglegt alpalandslag þar sem jöklar og tignarlegir tindar eru í aðalhlutverkum. Ekki skemmir fyrir að í þessari ferð gistum við í Ítölskum fjallaskálum sem hver fyrir sig er rómaður fyrir góðan mat og þá auðvitað sér í lagi pasta, enda er þessi leið oft í gamni nefnd spaghetti leiðin. Síðustu nóttina í ferðinni áður en við sigrum Dufourspitze, hátind Monte Rosa gistum við í hæsta fjallaskála Alpana, Margherita skálanum í 4554m þaðan sem við njótum fegursta sólseturs Evrópu.

Tímabil: Júní – September 2010
Lengd ferðar: 6 dagar, þar af 5 dagar á fjöllum
Verð á mann 1:1 Í vinnslu
Verð á mann 2:1 Í vinnslu

Við leggjum í hann frá Zermatt, margrómaðasta fjallbæ Sviss sem kúrir í botni Mattertal dalsins undir vökula auga Matterhorn sem rís á þriðja þúsund metra yfir bænum. Þessi einstaklega fallegi bær er upphafs og endastöð þessarar stórkostlegu fjallaferðar þar sem okkur gefst kostur á að klífa allt að tólf 4000m tinda á fimm dögum. Þessi ferð hentar mjög vel fyrir þá sem vilja ná hæðaraðlögun fyrir frekari alpaævintýri eða bara upplifa stórskemmtilega fjallamenningu Alpanna.

Innifalið í verði:

Leiðsögn faglærðra UIAGM fjallaleiðsögumanna alla ferðina (Hámark 2 farþegar per leiðsögumann)
Gisting í 2 nætur á gistiheimili í Zermatt
Gisting 4 nætur í fjallaskálum með morgunmat og kvöldmat
Allar kláf, lyftuferðir og aðrar ferðir á Zermatt svæðinu

Ekki innifalið í verði:

Ferðir til og frá Zermatt
Allur matur í Zermatt
Hádegis nesti og annað snarl í skálunum.
Drykkir svo sem flösku vatn og aðrir drykkir í skálunum
Tryggingar
Útbúnaðarleiga

   Monte Rosa - Ferðalýsing:

Dagur 1:
Mæting í Zermatt þar sem leiðsögumaðurinn hittir hópinn seinni part dags og farið er yfir ferðaáætlunina, útbúnað og aðstæður. Við gistum á gistiheimili Þar sem við getum skilið farangur okkar eftir á meðan við erum á fjöllum, sem er nauðsynlegt og þægilegt. Gistiheimilið er í miðbæ Zermatt

Dagur 2:
Við græjum þann búnað sem þarf að græja um morguninn og skoðum okkur aðeins um í Zermatt áður en við tökum kláfinn upp til Klein Matterhorn í 3820m. Þaðan liggur leiðin á fyrsta 4000m tindinn okkar Breithorn 4165m sem er mest klifni 4000m tindur Alpanna sökum þess hve nálægt Klein Matterhorn kláfnum hann er. Við dembum okkur svo niður Ítalíu megin alla leið í Val d'Ayas skálann sem þekktur er fyrir höfðinglegar móttökur og ljúffengan mat.

Dagur 3:
Dagurinn tekinn snemma að Alpa sið, eða um kl 04:00 og haldið út í myrkrið í átt að tvíburunum Pollux 4092m og Castor 4228 sem eru næstir á dagskrá. Pollux bíður uppá stórskemmtilegan klettahrygg með góðu brölti en Castor er öllu auðveldari með brattri fönn sem endar á tignarlegum tindi. Við höldum þverun þessara fjalla áfram og göngum niður í Sella skálann í 3858m þar sem við njótum enn og aftur Ítalskrar matargerðar og gestrisni.

Dagur 4:
Nú liggur leið okkar í Mantova skálann í 3470m en á leið okkar þangað klífum við alla vegana tvo af fjölmörgum 4000m tindum Monte Rosa þá Ludwigshöhe og Vincent Pyramid. Þessi leið er vel fær í tveggja manna hóp en ef aðeins einn er á ferð með leiðsögumanninum gefst kostur á að klífa Liskamm 4527m eftir einum brattasta hrygg Alpanna (Ekki fyrir lofthrædda)

Dagur 5:
Frá Mantova skálanum liggur leið okkar upp Lysgletscher jökulinn uppí Lysjoch skarð og áfram uppí Margherita skálann, hæsta gistihús Evrópu. Á leiðinni tökum við t.d Parrot Spitze eða fleiri hliðartinda Monte Rosa. Eftir kvöldmatinn njótum við vonandi margrómaðasta sólseturs Evrópu yfir góðu glasi í góðra vina hóp.

Dagur 6:
Við tökum daginn snemma að vanda og stefnum á hæsta tind Monte Rosa, Dufourspitze 4618m en á leið okkar þangað þverum við annan góðan tind, Zumsteinspitze. Af toppnum er eitt víðfeðmasta fjallaútsýni Alpanna þar sem frjósamar sléttur Ítalíu teygja sig til suðurs en tignarlegir fjallgarðar Alpanna í Austur og Vestur. Niður leiðinn er eftir skemmtilegum klettahrygg og svo snjó og Jökli alla leið í Monte Rosa skálann þar sem við líklega tökum okkur pásu og njótum hvíldar áður en við klárum gönguna til Rotenboden þar sem við tökum lest til baka til Zermatt. Um kvöldið er ekki úr vegi að fagna gríðarlega góðum túr.

      Frekari upplýsingar:

Greiðsluskilmálar:
30% af heildarverði ferðar á mann greiðist við bókun en eftirstöðvarnar ekki síðar en 90 dögum fyrir brottför.

Matur og Gisting:
Í Zermatt gistum við á gistiheimili eða hóteli í göngufæri frá miðbænum þaðan sem stutt er í allar lyftur og búðir. Herbergin eru 2 manna með baðherbergi en fyrir þá sem vilja vera einir í herbergi greiðist aukagjald. Dagana sem að við erum á fjöllum getum við skilið allan farangur eftir í geymslu á gistiheimilinu/hótelinu. Skálarnir bjóða allir uppá veitinga og bar þjónustu ásamt því sem þar er hægt að kaupa helstu nauðsynjar eins og t.d súkkulaði, vatn o.f.l Kvöldverðir eru þrí til fjórrétta, súpa,pasta, kjötréttur og desert en morgunverðurinn er öllu lítilfjörlegri, yfirleitt brauð, sulta og kaffibolli. Gistingin er í kojum í misstórum herbergjum, yfirleitt 8-24 manna. Nauðsynlegt er að vera með þunnan lakpoka til að sofa í en skálarnir eru allir með sængum, teppum og koddum. Engar sturtur er að finna í skálunum. Hádegisnesti verður hver og einn að kaupa og taka með sér fyrir ferðina. Best er að vera með sambland af orkustykkjum, súkkulaði, osti og pylsum því samlokur endast illa í bröltinu. Eins og áður sagði er hægt að kaupa heita smárétti í flestum skálanna ásamt öðru snarli og það er oft góður kostur þegar komið er snemma niður af fjalli áður en síðdegis aðlögunarlúrinn er tekinn.

Líkamleg geta, þrek og þor:
Monte Rosa gangan er ekki mjög löng á hverjum degi, en í mikilli hæð. Tæknileg klifurkunnátta er ekki nauðsynleg en grundvallar kunnátta á jöklagöngu, sprungubjörgun og almennri línuvinnu er nauðsynleg. Yfir þá hluti er farið á fyrri hluta ferðarinnar. Þátttakendur verða að vera í góðu líkamlegu og andlegu formi, það er ótrúlegt hvað andlegi þátturinn spilar stórt hlutverk þegar komið er í hæð og líkaminn fer að kvarta, þá er það oft andlegi styrkurinn sem drífur mann áfram. Góð æfing fyrir Monte Rosa er að ganga á hæstu tinda landsins og það má með sanni segja að ef fólk á í engum vandræðum með Hvannadalshnjúk að þá á Monte Rosa ekki að vera vandamál svo lengi sem hæðaraðlögunin hefur gengið vel. Ein af kröfum Bergmanna til þeirra sem hug hafa á Monte Rosa ferðinni er að hafa klifið stórann tind á Íslandi með leiðsögumönnum okkar á sama tímabili og Monte Rosa ferðin er á döfinni. Þannig geta leiðsögumenn okkar tekið út getu fólks og komið með góða punkta um frekari ferðir eða þjálfun fyrir ferðina stóru.

Búnaður:
Best er að allir þátttakendur séu með sinn eigin búnað sem þeir eru vanir að nota og vita að virkar. Annars er hægt að leigja allan sérhæfðan fjallabúnað hjá Bergmönnum eða í Zermatt. Skoðið meðfylgjandi útbúnaðarlista vel og munið að rétt val á útbúnaði getur skipt sköpum um hvort ferðin er vel heppnuð eða ekki.

   Útbúnaðarlisti fyrir Monte Rosa

Sumt af þessum búnaði er hægt að fá leigt hjá Bergmönnum eða hjá Fjallakofanum í Hafnarfirði 510 9505. Ef þú hefur einhverjar spurningar varðandi búnaðarval þá ekki hika við að hafa samband.