Jökulfirðir - Seglskútu skíða ævintýri | Bergmenn fjallaleiðsögumenn | Á Íslandi leggjum við aðaláherslu á ísklifur, fjallaskíða og þyrlu skíðaferðir auk fjallaklifurs

Bókun

Jökulfirðir - Seglskútu skíða ævintýri

Dagur
Fjöldi

Það eru ekki mörg lýsingarorð sá ná yfir þá einstöku upplifun að sigla um á skútu og skíða frábærar brekkur á svæði þar sem þú ert einn í heiminum. Slaka svo á um borð yfir dýrindis kræsingum og góðu glasi og endurtaka það svo fimm daga í röð. Jökulfirðir og Hornstrandir eru þjóðþekkt svæði fyrir einstaka náttúrfegurð en einnig fyrir einstaklega mikil snjóþyngsli og brött fjöll. Það er nákvæmlega það sem við erum á höttunum eftir og könnum, útfrá fljótandi fjallahótelinu Auroru. Meira

Lengd ferðar:

Verð: Verð fyrir 2010 í vinnslu

Aurora er 60 feta seglskúta sem gerð er út frá Ísafirði af tveimur snillingum, þeim Rúnari og Búbba. Hugmyndir að skútu skíðaferðum blunduðu lengi hjá þeim og Jökli Bergmann og það var svo árið 2006 sem draumurinn varð að veruleika með fyrstu ferðinni í Jökulfirði. Þessar ferðir eru nú gríðarlega vinsælar og ekki að undra þar sem að þetta er einstakt tækifæri til þess að skíða á svæði þar sem að engar samgöngur né þjónusta er til staðar, en frábærar fjallaskíðalendur. Hvað er þá hentugra en fljótandi færanlegt fjallahótel með heitri sturtu og gómsætum kræsingum úr náttúru svæðisins, framreiddum af skipstjóranum sjálfum. Taktu þátt í einstakri upplifun.

Hvað gerir þessa ferð svona magnaða?

Einstakt tækifæri til að sameina fjallaskíðaferð og skútusiglingu
Rómuð náttúrufegurð friðlandsins á Hornströndum og Jökulfjörðum
Gómsætar kræsingar úr fersku hráefni hafsins, fiskur, kræklingur, svartfugl o.f.l
Að læra réttu handtökin við siglingar á 60 feta keppnisskútu
Leiðsögn fagmanna sem gjörþekkja svæðið
Frábærar brekkur og nægur snjór, skíðað úr fjöru í fjöru alla daga
Einstaklega stöðugur snjór nálægt hafi leyfir okkur að skíða brattari brekkur en víða annarsstaðar
Landkönnun og tækifæri til að skíða áður óskíðaðar brekkur

Innifalið í verði

Full afnot af skútunni Auroru ásamt tveggja manna áhöfn
Leiðsögn fjallaleiðsögumanns alla ferðina
Allur matur um borð og nesti fyrir daginn
Eldsneyti, hafnargjöld og skattar
Afnot af siglingafatnaði
Ferðir til og frá Ísafjarðarflugvelli á fyrsta og síðasta degi

Ekki innifalið í verði

Ferðir til og frá Ísafirði
Matur fyrsta daginn þar til komið er um borð í Auroru
Afnot af gervihnattasíma um borð
Persónulegar tryggingar
Áfengi

SKOÐAÐU MYNDIR ÚR ÞESSARI FERÐ

Ferðaáætlun fyrir Jökulfjarðaferð

Dagur 1

Komið til Ísafjarðar seinnipart dags og lagt úr Höfn um kl 19:00. Um tveggja tíma sigling tekur við til Hesteyrar í Jökulfjörðum. Þótt seint sé að þá er tækifæri til að máta sig við skíðin og fara yfir snjóflóða ýlana og björgun úr snjóflóðum eins og alltaf er gert í upphafi fjallaskíðaferðar. Okkur gefst líka tækifæri til að skoða okkur um í litla þorpinu á Hesteyri og kíkja á gömlu hvalstöðina.

Dagur 2

Við skíðum úr Hesteyrarfirði yfir í Veiðileysufjörð á meðan Aurora dólar hringinn og hittir okkur hinu megin. Flesta daga ferðarinnar skíðum við úr einum firði í annan og könnum ávallt ótroðnar slóðir. Tækifærin til þess að skíða frábærar brekkur eru óþrjótandi.

Dagur 3

Ferðalagið heldur áfram og í þetta sinn liggur leið okkar yfir í Lónafjörð. Lónafjörður er einstakur staður á allan hátt, þar er gríðarleg náttúrufegurð, frábærar brekkur og jafnframt gjöfular kræklinga flæður. Hvað skyldi verða í matinn?

Dagur 4

Við stöldrum við í Lónafirði í dag því það er ógjörningur að komast yfir það að skíða allar bestu brekkurnar á einum degi. Fyrir þá sem vilja taka styttri dag er hægt að kíkja í kayak og rannsaka strandlengju fjarðarins þar sem meðal annars má finna heita uppsprettu eða skella sér í sjósund.

Dagur 5

Hápunkti ferðarinnar í metrum talið er náð á þessum degi á leið okkar yfir í Hrafnfjörð þar sem að lengstu brekkur Jökulfjarða bíða eftir okkur. Í lok dags er tilvalið að taka smá göngutúr í landi og votta Fjalla Eyvindi virðingu okkar þar sem hann hvílir undir grænni torfu í þessari náttúru paradís. Þar sem að þetta er síðasta kvöldið okkar að þá má fastlega gera ráð fyrir veislu um borð í Auroru.

Dagur 6

Við tökum daginn snemma og skíðum síðustu brekkurnar í þessari ferð áður en við siglum seglum þöndum til baka til Ísafjarðar. Við leggjumst að bryggju seinni part dags, nógu snemma til þess að ná flugi til Reykjavíkur eða bara til að skella okkur í sund og slaka á eftir frábæra ferð.

Útbúnaðarlisti fyrir Jökulfirði

- Vind og vatnsheldur jakki með öndun (Gore Tex eða sambærilegt)

- Vind og vatnsheldar buxur (Gore Tex eða sambærilegt)

- Skíðasokkar

- Nærföt (ull eða gerviefni)

- Skíðabuxur (Soft shell, flís)

- Flís eða ullar peysa

- Hanskar (2 pör,þykkir,þunnir)

- Húfa

- Bakpoki 30-40 lítra

- Vatnsflaska, minnst 1 líter

- Lítil sjúkrataska (Hælsæris plástrar og annað persónulegt sjúkradót)

- Sólgeraugu

- Skíðagleraugu

- Sólaráburð á andlit og varir

- Skíði (Fjallaskíði, Telemark eða split board)

- Skinn og skíðabroddar

- Skíðastafir

- Skíðaskór

- Skófla

- Snjóflóðastöng

- Snjóflóðaýlir

- Taska fyrir auka föt og annað

- Gönguskór

- Inniskór eða dekkskór

- Svefnpoki

- Tannbursti og nauðsynlegt snyrtidót

- Myndavél

- Góða bók eða skemmtilegt spil og flösku af uppáhalds meðalinu þínu

Sumt af þessum búnaði er hægt að fá leigt hjá Bergmönnum eða hjá Fjallakofanum í Hafnarfirði 510 9505. Ef þú hefur einhverjar spurningar varðandi búnaðarval þá ekki hika við að hafa samband.