Bergmenn fjallaleiðsögumenn | Á Íslandi leggjum við aðaláherslu á ísklifur, fjallaskíða og þyrlu skíðaferðir auk fjallaklifurs

Heilir og sælir kæru vinir, ferðafélagar og samstarfsfólk

Þá er komið að því að vertíðin fer af stað og ekki seinna en vænna að senda ykkur línu og láta aðeins vita af þeim fjölmörgu góðu hlutum sem gerst hafa í vetur og stefnt er að með hækkandi sól. Veturinn hefur verið misviðrasamur svo ekki sé meira sagt, en það er nú víst alltaf svo og ekki furða að maður byrji ekki almennilega að fara á fjöll fyrr en akkúrat um þetta leitið. Það eru þó mikil gleði tíðindi að t.d Bláfjöllin hafa náð fleiri opnunardögum en taldir verða á fingrum annarar og í byrjun janúar gaf jú feikivel til ísklifurs um land allt.



Lesa meira

Nú fer hver að verða síðastur í að bóka sig með okkur á Mont Blanc í sumar. Það eru enþá nokkrar dagsetningar lausar en þeim fækkar eins og snaróðri flugu. Að venju eru það Jökull Bergmann og íslandsvinurinn Gregory Facon sem sjá um ferðir Bergmanna í alpana þetta sumarið, og það fer vel því þeir félagar þekkja fjallið eins og lófann á sér eftir tugi velheppnaðra leiðangra á þetta eftirsótta fjall. Smelltu hér til að skoða nánar....

Kæru vinir, ferðafélagar, starfsmenn og allt gott fjallafólk

Með þessum litla nýárspósti langar mig til að þakka ykkur kærlega fyrir stórmagnað 2010 og óska ykkur gríðarlegrar gæfu og alls hins besta á nýju ári. Eins og hefð er orðin fyrir að þá læt ég hér fljóta með smá annál frá árinu sem var að líða, en eins og ávallt  þá verður hér aðeins stiklað á stóru, því fjöldi frábærra ferða og minninga frá árinu 2010 er þvílíkur að ''inboxið'' ykkar fengi væntanlega meltingar truflanir ef öll romsan kæmi í einum pósti ;-) Svo flýtur að sjálfsögðu með, smá yfirlit yfir öll þau ævintýri sem framundan eru, en þar er sömu sögu að segja, einfaldlega ''of'' mikið af fáránlega spennandi ferðum, sama hvort það er á skíðum, tveimur, eða fjórum misfljótum. Lesa meira

Heil og sæl kæru vinir, ferðafélagar og samstarfsfólk

Meðfylgjandi er lítil jólakveðja norðan af Tröllaskaganum, þar sem vetur konungur ræður ríkjum þessa dagana, með hríðarbyljum, skafrenningi og almennum hraglanda. Ólíkt öðrum bændum hér í sveit þá gleðst ég innilega yfir stórhríðinni og öskra hás upp í vindinn meira, meira, meira.

Þetta árið var tekin ákvörðun um að í stað hefðbundinnar regnskóga eyðingar og ómældrar losunar gróðurhúsalofttegunda sem fylgir víst jólakorta skrifum, að þá yrði góðu málefni lagt lið og hvað er þá betra í huga fjallamannsins en að styrkja okkar góða Ferðafélag Svarfdæla sem nú hefur gengið í endurnýjun lífdaga og stefnir ótrautt á uppbyggingu ''alvöru'' fjallaskála á Tröllaskaganum ásamt almennri vakningu á sviði fjallamennsku. Þú sem sé afsakar að það komi ekkert kort inn um lúguna en getur yljað þér við tilhugsunina um hlýja skála í faðmi fjallanna á Tröllaskaganum.

Að lokum langar mig til að þakka ykkur öllum innilega fyrir allar frábæru ferðirnar á árinu sem er að líða, þar sem ótalfjallaskíða og þyrluskíðaferðir voru farnar, ásamt mögnuðum  könnunar leiðöngrum á áður ókannaðar slóðir og svo náttúrulega allar fjallaskíða-, göngu og klifurferðirnar í Ölpunum síðasta vetur og sumar.

Nánari fregnir af þessu öllu saman koma í næsta pósti ásamt lýsingum á öllum hrikalega spennandi ferðum ársins 2011.

Fyrir hönd Bergmanna og Arctic Heli Skiing sendi ég þér kæra jólakveðju frá Klængshóli í Skíðadal

Jökull Bergmann

Stærsta skíða tímarit Skandinavíu Åka Skidor var að birta 10 síðna grein um fjallaskíðaferðir á Tröllaskaganum, nánar tiltekið í faðmi fjallanna hjá okkur á Klængshóli í Skíðadal. Gösta Fries sem er vel þekktur sænskur ljósmyndari tók þessar glæsilegu myndir sem príða þessa flottu grein. Smelltu á forsíðuna hér til hliðar til að hlaða niður greininni í PDF og ef þú ert ekki sleip/sleipur í Svenskunni að þá ættu myndirnar í það minnst að gleðja.