Bergmenn fjallaleiðsögumenn | Á Íslandi leggjum við aðaláherslu á ísklifur, fjallaskíða og þyrlu skíðaferðir auk fjallaklifurs

Heilir og sælir kæru vinir, ferðafélagar og samstarfsfólk og gleðilegt nýtt fjallaár.

Ég vona að þessi póstur hitti vel á ykkur eftir ánægjulega jólahátíð nær og fjær. Að vanda sendi ég ykkur með þessu litla skeyti, mínar allra bestu óskir um gæfuríkt komandi ár og þakka ykkur af öllu hjarta fyrir frábærar stundir á fjöllum á undanförnum árum. Megi þær bara verða fleiri og betri á nýja árinu. Annáll þessa árs gæti nú líklegast fyllt meira en eina síðu því það var í nógu að snúast en mig langar nú samt að vanda að fara aðeins yfir öll þau stórskemmtilegu ævintýri í grófum dráttum og vona að það verði ykkur hvatning til að drífa ykkur á fjöll eða þó alla vegana í smá göngutúr eða bara í fjallið að renna sér. Fyrir þá sem ekki nenna að lesa að þá fylgir þessari áramótakveðju smá video kveðja á youtube sem þú getur skoðað með því að smella hér......
Árið 2009 hófst með botnlausri púður skíðun í Kanada þar sem að ég starfaði enn eitt árið sem heli ski leiðsögumaður fyrir félaga mína hjá Selkirk Tangiersí bænum Revelstoke BC. Frábær vertíð að vanda með tug þúsundum fallmetra skíðuðum með frábæru fólki. Að þessu sinni fór ég einsamall í Víking í leit að erlendum gjaldeyri á meðan fjölskyldan beið á Tröllaskaganum í ofvæni eftir að nýjasti meðlimurinn kæmi í heiminn. Stærsti atburður 2009 var svo náttúrlega síðastliðið vor þegar Úlfur Berg Jökulsson kom í heiminn, stærðarinnar drengur sem dafnar vel og verður kominn á skíði áður en ég veit af. Tímasetningin var kannski ekki sú best skipulagðasta af minni hálfu þar sem að aldrei hefur verið meira að gera á Tröllaskaganum í fjallaskíða og þyrluskíðaferðum en þetta vorið, en allt fór þetta nú eins og best verður á kosið undir stjórn húsfreyjunnar og hins raunverulega yfirmanns Bergmanna henni Sunnu Björk. En það var ekkert slakað á þegar snjóa tók að leysa heldur allt sett af stað við stofnun á nýju fyrirtæki í útivistargeiranum. Það eru Glacier Guides sem staðsettir eru í Öræfasveit og sérhæfa sig í göngum á skriðjöklunum þar í kring, Hvannadalshnúksferðum, ísklifri og margskonar útivistar afþreyingu fyrir alla, útfrá Skaftafelli. Þetta stórskemmtilega verkefni sem er samstarfBergmanna og snillinganna Einars Ísfeld og félaganna í Arctic Adventures fór gríðarvel af stað með mörg þúsund ánægðum viðskiptavinum og 10-20 manns í vinnu í allt sumar. Glacier Guides munu að sjálfsögðu bjóða uppá Hnúksferðir og fleira spennandi með hækkandi sól. En það var í mörg horn að lýta þetta sumarið og næst var stefnan tekin í Alpana þar sem að hver tindurinn á fætur öðrum var klifinn. Þessi alpa vertíð heppnaðist mjög vel með góðu veðri og aðstæðum og er stefnan tekin á að endurtaka leikinn sumarið 2010 því Íslendingar virðast ólmir í að reyna sig viðhátinda Alpanna. Með haustinu kom svo kærkomin hvíld og tími fyrir fjölskylduna á Tröllaskaganum ásamt undirbúningi fyrir veturinn sem nú herjar svo um munar með hné djúpu púðri og frábærum ísklifur aðstæðum hér fyrir norðan. 2010 virðist ætla að heilsa með frábærum aðstæðum eins og áður sagði og nóg verður um að vera með hækkandi sól. Fjallaskíða prógramm Bergmanna hefur aldrei verið jafn fjölbreytt og þetta vorið þar sem að nýjar slóðir verða kannaðar ásamt því að þyrlan  verður notuð óspart fyrir þá sem leggja meiri áherslu á niðurferðina. Fyrri part vetrar verður varið í ísklifur ferðir  hér á Fróni en í fyrsta sinn í 7 ár verð ég staddur hér heima fyrstu mánuði ársins til að einbeita mér að öllum þeim spennandi verkefnum sem bíða. En nóg blaður í bili því það eru ísfossar þarna úti sem bíða fyrstu uppferðar og púður sem þarf að þeyta til, ég óska þér enn og aftur alls hins besta á nýja árinu og vonast til að sjá þig fjöllum, og eins og alltaf, ekki hika við aðhafa samband ef það er eitthvað sem að ég get gert fyrir þig.

Fjalla og árámótakveðjur af Tröllaskaganum

   Jökull Bergmann