4 Daga Ferðir

Við höfum sérhannað 4 daga pakka í febrúar og mars sem tilvalið er að spyrða við nokkra daga til viðbótar á skíðasvæðum Tröllaskagans og skíðafrí vetrarins er klárt! Engar áhyggjur af vírus frussandi flautubarþjónum, smekkpökkuðum gondólum og yfirfullum Aprés Ski Schnitzel búllum í Ölpunum, heldur bara þú og nokkrir vinir í prívat lúxus á heimsklassa hér á Fróni fyrir sama pening! Þetta er einstakt tækifæri sem ekki mun bjóðast aftur til að prófa þá ótrúlega mögnuðu upplifun að þyrlast um Tröllaskagann, svífa niður púður fylltar brekkurnar og láta stjana við þig eins og útlenskan ríkisbubba og það á hálfvirði! Mjög takmarkað sætaframboð, fyrstir bóka fyrstir fá!

Verðdæmi: 4 daga ferð áður 1.213.600 nú 606.800 ISK á mann

Við skíðum frá Klængshóli í Skíðadal og Karlsá á Upsaströnd þar sem að allar ferðir byrja og enda og skíðasvæði okkar nær um allan Tröllaskagann sem og Hulduland sem er skaginn austan Eyjafjarðar. Frá Klængshóli og Karlsá er aðeins örstutt flug á næstu tinda, t.d Hestinn sem gefur okkur 1200 skíðaða fallmetra beint heim á hlað á Kængshóli. Hvort sem um 4 daga ferð eða dagsferð er að ræða skíðum við í einum til þremur 5 manna hópum þar sem hver hópur hefur sinn faglærða skíðaleiðsögumann sér til fulltingis.