Ferð á Svalbarða er kannski ekki það fyrsta sem kemur í hugann þegar hugsað er um næstu skíðaferð en hér er samt sem áður um að ræða einstakt fjallaskíðaævintýri sem ætti að vera á allra laupalista.

Við hefjum túrinn á 78 breiddargráðu í Longyearbyen þar sem við stígum um borð í viðarskonnortuna, og heimili okkar næstu daga, S/V Linden. Linden er án efa fallegasta skonnorta í heiminum í dag og skipstjórinn og góðvinur okkar Rasmus elskar fátt, ef eitthvað, meira en að sigla henni á full þöndum seglum.

Með byr í seglin yfirgefum við Longyearbyen í leit að okkar fyrstu skíðaleiðum og það er af óteljandi möguleikum að velja. Á hraðleið frá siðmenningu, ef svo má kalla Longyearbyen, tekur ósnortin náttúran við og líður ekki að löngu áður en fyrsti ísbjörninn sést við ströndina eða rostungur stingur hausnum upp á yfirborðið. Hvalir synda hér allt í kring, selirnir eru óteljandi, Svalbarðshreindýrin og refurinn ráfa um í ætisleit og heiðagæsin flýgur yfir firði.

S/V Linden er stærsta skonnorta Evrópu í dag, rétt undir 160 fet að lengd. Hún var byggð á Álandseyjum árið 1993 eftir upprunalegri mynd forvera hennar og alnöfnu sem var byggð árið 1920 sem Finnskt flutningaskip. Um borð eru 7 káettur, hver með sitt baðherbergi og sturtu, tvær setustofur, bar og gufubað. Áhöfnin er fyrsta flokks ásamt öllum helsta siglinga- og öryggisbúnaði, Linden er ísvarin og því fátt til fyrirstöðu að sigla inn ísjakafulla firði og kasta ankeri þar sem okkur hentar. Um borð er ræktaður lítill matjurtagarður og allur maturinn um borð er fyrsta flokks, auk þess fáum við að smakka á helstu villibráðinni af svæðinu. Hér er nóg pláss til að teygja úr sér eftir góðan dag á fjöllum og fátt betra en að láta þreytuna líða úr sér í gufubaði milli þess sem við stingum okkur til sunds í Grænlandshafið.